Skip to main content
Inniò, associazione culturale

Inniò – dal furlan “di nissune bande, dapardut” –  e je une associazion culturâl nassude tal 2020 par dâ vôs a la diversitât sot cualsisei forme. Fie de esperience internazionâl di SUNS Europe, la nestre realtât e met adun professioniscj de direzion artistiche, de ricercje storiche e culturâl e de gjestion tecniche par trasformâ la tutele dai dirits linguistics in azions artistichis concretis.

In
cantîr

DEVID STRUSSIAT
“Al savê dal fen”

8 Jugn 2026

Finalmentri, dopo tante spiete, al ven fûr “Al savê dal fen”, la prime jessude discografiche firmade Manledrôs!
Un albumdulà che folk, psichedelie e avant-rock a son masanâts dentri il bidon dal compost, strucant fûr un fertilizant di suns anarchic e impussibil di meti intun scompart. Dentri dai tocs, la poesie si inrodole cence padìn, a la ricercje di une armonie che e grampe i sintiments jenfri l’om e la nature.
Une robe preziose, di tignî e conservâ cun cure.
In curt gnovis su la distribuzion fisiche dal disc e su lis primis datis de presentazion live!

FRIÛL meets LADINIA

15, 16, 17 Mai 2026

Si è a pene sierât un intens e bielissim fin di setemane insiemi ai amîs ladins de Cooperativa InOut – Val di Fassa.
Musiche, ideis, progjetazion culturâl, cualchi tai e frico fumant, imbombâts tai colôrs e te anime dai Cuei Orientâi dal Friûl.
Cuant che teritoris diviers si cjatin pardabon, a nassin relazions, visions e gnovis stradis di cjapâ insiemi.

Manledrôs

Avrîl 2026

Inniò e Nota a unissin lis fuarcis par dâ vite a une gnove golaine discografiche: une scoreade sonore planificade par dâ une scjassade al masse cuiet mont de musiche “par furlan”.
Vie pal 2026, la creativitât di Devid Strussiat, Massimo Silverio, Cûr di Veri, Arbe Garbe, Unviâr e tancj altris e cjaparà forme intune sdrume di produzions cence compromès, su diferents supuarts: LP, CD e fintremai lis mai dismenteadis cassetis.
Gnovis jessudis e ristampis che a sepin dâ dignitât e valôr al lavôr, cence polse, di une gjenerazion creative buine di reinventâ une lenghe che si confronte cu la contemporanitât.
Manledrôs al è un progjet sostignût de ARLeF (Agjenzie Regjonâl pe Lenghe Furlane) e de Regjon Autonome Friûl – Vignesie Julie.

    I NESTRIS PROGJETS

    Si movìn tra produzion discografiche, editorie e grandis rassegnis multidissiplinârs, cul obietîf ambiziôs di tornâ a atualizâ lis culturis minorizadis midiant dai lengaçs contemporanis, diliberantlis dai stereotips dal folclôr. Da la gjestion di progjets complès e di respîr internazionâl a la valorizazion dal patrimoni etnografic e musicâl in sintonie cu lis piçulis comunitâts… Inniò al agjìs come un laboratori creatîf dulà che lis lenghis minorizadis a deventin imprescj di riflession sociâl, buinis di coneti il locâl cuntune dimension europeane e cosmopolite.

    01

    Festivals & Rassegnis

    Inniò, art tai lûcs di mont
    Une rassegne multidissiplinâr che e esplore il leam profont tra espression artistiche e teritori. A traviers instalazions site-specific, performance e concierts in lûcs naturâi e evocatîfs – des vecjis minieris a lis pichis de Cjargne – il progjet al trasforme il paisaç intun veicul di bielece e di riflession contemporanie.
    + info
    Istât/Unvier
    Nassudis de colaborazion plurienâl cul Comun di Udin e il so Ufici pe Lenghe Furlane, chestis rassegnis stagionâls a son dedeadis ae valorizazion des produzions musicâls contemporaniis. Istât/Invier si configure come une vere scune de creativitât, buine di stiçâ i artiscj viers lengaçs inovatîfs e sonoritâts atuâls che a superin i schemis dal folclôr tradizionâl, puartant la lenghe furlane tal centri de sene culturâl moderne.
    Linguae Mundi
    Festival Internazionâl des Lenghis di Minorance inserît tal program di GO!2025. Un laboratori transfrontalîr tra Italie e Slovenie che, tra cunvignis tecnichis e intervents artistics, al promôf la cooperazion europeane e il valôr insostituibil da lis diversitâts linguistichis come patrimoni dal futûr.

    CJAMINS & TERITORI

    Manledrôs
    Golaine discografiche dedeade a la produzion e la publicazion di gnûfs lavôrs in lenghe furlane. Il progjet al sostèn il ferment creatîf atuâl metint adun il recupar de tradizion cun sonoritâts modernis, garantint ai artiscj une distribuzion professionâl sui supuarts fisics e su lis plateformis digjitâls.
    Natisa / Viers (Cjaminadis Artistichis)
    Inniò e promôf il traviersament fisic dal teritori come at di cussience artistiche, dulà che il cjamin al devente il fîl condutôr tra musiche, art e leterature. Tal 2025, in ocasion di GO!2025, o vin ideât Natisa: une carovane di artiscj che par une setemane a àn percorût l’intîr cors dal flum Nadison. Tal 2026, il progjet Viers nus viodarà impegnâts te esplorazion de pedemontane pordenonese: un viaç a pît su lis olmis di vôs poetichis come Federico Tavan, Novella Cantarutti e Leonardo Zanier, par riscuvierzi la anime dai lûcs midiant lis peraulis di cui che ju à abitâts e cjantâts.
    + info

    02

    03

    EDITORIE

    Bota e Rispuesta
    Un progjet editoriâl focalizât su la tutele e la difusion dal patrimoni etnografic. Midiant di une ricercje rigorose e une divulgazion curade, la iniziative e smire a documentâ e tornâ a atualizâ lis storiis e lis identitâts des comunitâts locâls, rindintlis acessibilis al public contemporani.
    Manledrôs
    Golaine discografiche dedeade ae produzion e publicazion di gnûfs lavôrs in lenghe furlane. Il progjet al sostèn il ferment creatîf atuâl metint adun il recupar de tradizion cun sonoritâts modernis, garantint ai artiscj une distribuzion professionâl sui supuarts fisics e lis plateformis digjitâls.

    PRODUZIONS
    AUDIOVISIVIS

    SA-EU Dialogue: Democracy in the Context of Culture
    Une impuartante co-produzion internazionâl realizade in colaborazion cul Sibikwa Arts Centre di Benoni (Sudafriche). Patrocinât de Union Europeane, il documentari al esplore il rûl de culture tai procès democratics, metint a confront la esperience europeane e chê sudafricane intun dialic profont su identitâts e dirits.
    Natisa (Serie Documentario RAI)
    La esperience de cjaminade artistiche dilunc il flum Nadison e je deventade une conte par imagjins in cinc puntadis, co-produsût de sede regjonâl de RAI par il Friûl-Vignesie Julie. Il documentari al mostre il viaç de carovane di artiscj viers GO!2025, trasformant il cjamin fisic intune narazion visive de memorie e dal paisaç.
    + info
    Natisa (podcast)
    Il viaç a pît dai sunadôrs si è trasformât ancje intun podcast in 7 episodis. Produsût insiemi a Radio Onde Furlane, pe regje di Pauli Cantarut, il lavôr al traspon l’itinerari di ogni zornade intun viaç jenfri i suns: vôs, rumôrs, sunadis e incuintris dilunc il Nadison.
    + info

    04

    05

    NETWORKING &
    DIRITS LINGUISTICS

    AA6 (Associazione Articolo 6)
    Inniò e je soci fondadôr e prin firmatari di “Articolo 6”, la prime rêt unitarie che e clame adun dutis lis 12 minorancis linguistichis storichis ricognossudis in Italie da la Leç 482/99. Partecipant ativamentri a cheste plateforme nazionâl, la associazion e colabore a la costruzion di une vôs comun tes istituzions italianis e europeanis, promovint la cooperazion strategjiche tra comunitâts diferentis — dai albanês ai sarts, dai furlans ai grêcs – par trasformâ la diversitât linguistiche intun motôr di svilup culturâl e civîl par il Paîs intîr.